कोशी प्रदेशको मन्त्रिपरिषद् बैठकले विभिन्न सात निर्णय हरु गरेको छ । आज बसेको प्रदेश मन्त्रिपरिषद् बैठकले विकास र कानुनी संरचनासँग सम्बन्धित सात वटा महत्त्वपूर्ण निर्णयहरू समेत गरेको छ ।
बिज्ञापन
सरकारले मन्त्रिपरिषद्को कानुन, न्याय तथा प्रदेश मामिला समितिबाट परिमार्जित भई आएको कोसी प्रदेश योजना आयोग गठन तथा सञ्चालन (गठन आदेश) २०८२ लाई स्वीकृत गरेको छ । यसैगरी, प्रदेशमा कानुनी सहायतासम्बन्धी व्यवस्था गर्न कोसी प्रदेश कानुनी सहायता विधेयकको मस्यौदा तयार पार्न सैद्धान्तिक सहमति दिएको छ ।
बिज्ञापन
बैठकले विकास आयोजनाहरूतर्फ नेपाल र जापान सरकारबीचको आपसी सहमतिमा सञ्चालित कोसी पम्प चन्द्र नहर सिँचाइ आयोजनामा प्रयोग हुने सवारीसाधनहरूलाई कर छुट दिने प्रस्ताव पारित गरेको छ ।
त्यस्तै, ग्रामीण सडक सञ्जाल सुधार आयोजनालाई प्रभावकारी रूपमा सञ्चालन गर्न प्रदेश सरकारको तर्फबाट साढे १२ प्रतिशत म्याचिङ फन्ड उपलब्ध गराउने निर्णय भएको छ । यो कार्यक्रमअन्तर्गत संघीय सरकारले ७७ करोड पुँजीगत र चालु ७० लाख रुपैयाँ उपलब्ध गराएको छ ।
बिज्ञापन
विपन्न नागरिकको आवासको अधिकार सुरक्षित गर्नका लागि कोसी जनता आवाससम्बन्धी मापदण्डसहितको कार्यविधि २०८२ लाई मन्त्रिपरिषद्ले स्वीकृति गरेको छ ।
यस्तै, प्रदेश सरकारले प्रदेशसभाको आगामी हिउँदे अधिवेशन माघ २५ गतेका लागि आह्वान गर्न प्रदेश प्रमुखलाई सिफारिस गर्ने निर्णय गरेको छ । आज बसेको प्रदेश मन्त्रिपरिषद् बैठकले आगामी माघ २५ गते दिउँसो २ बजे बस्ने गरी प्रदेशसभाको बैठक बोलाउने गरी सिफारिस गरेको हो ।
हाल प्रदेशसभाको आफ्नै भवन र सचिवालय निर्माणको क्रममा रहेकाले विराटनगरस्थित वीरेन्द्र सभागृहमा अधिवेशन हुने जनाइएको छ । मासिक आठ लाख रुपैयाँ भाडा दिने गरी बैठक सञ्चालन गर्न तयारी छ ।
